इतिहासले गद्दारहरु जन्माएछः वैद्य

काठमाडौं,फागुन २१ । 

नेकपा माओवादीका अध्यक्ष मोहन वैद्यले राष्ट्रियता ऐतिहासिक रुपमै खतरामा परेको धारणा व्यक्त गरेका छन् । झट्ट हेर्दा बाहिरी रुपमा लोकतन्त्र कमजोर बनेको देखिए पनि यथार्थमा मुलुकको अस्तित्व नै संकटमा परेको वैद्यको कथन छ । उनले यतिबेला मुलुकको सत्ता युरोपेली संघ (ईयु) र छिमेकी देश भारतको मुठ्ठीमा कैद रहेको ठोकुवा गर्दै भने, ‘चार पार्टीका नेतालाई भारतीय राजदूत र ईयुका प्रतिनिधिले प्रधानन्याधीशलाई प्रधानमन्त्री बनाउने निर्देशन दिएका हुन् । यहाँसम्म कि शीतल निवासमै गएर राष्ट्रपति र चार दलका नेतालाई हाम्रो मुलुक शासन सत्ताबारे उनीहरुले डिक्टेट गरेका छन् ।’ प्रधानन्यायाधीशलाई चुनावी सरकारको प्रधानमन्त्री बनाउने निर्णय बाह्य रुपमा एमाओवादीको देखिए पनि सबै एजेण्डा विदेशीकै भएको दाबी गर्दै वैद्यले सार्वजनिक गरेको धारणामा आफूलाई पनि विदेशीहरुले प्रधानन्यायाधीश नेतृत्वको स्वतन्त्र चुनावी सरकार बनाउने कुरा पहिले नै सुनाएको खुलासा गरे । एमाओवादी अध्यक्ष पुष्पकमल दाहाल र प्रधानमन्त्री बाबुराम भट्टराई विदेशीका दलालका भरपर्दा शक्ति भएको आरोप लगाउँदै उनले समय आएपछि देशघातीहरु जनताको तहबाट बढारिने चेतावनी दिए । इतिहासले गद्दारहरु जन्माएछ भन्ने गुनासो गर्दै वैद्यले प्रचण्ड र बाबुरामप्रति रोष प्रकट गरे । 

Read more at: http://www.xpresskhabar.com