टोपबहादुरले खोलेको रहस्यमा देउवा–दाहाल–बाबुरामको नयाँ कनेक्सन

काठमाडौं, २५ मंसिर–माओवादी संसदीय दलका उपनेता टोपबहादुर रायमाझी बाबुराम भट्टराई निकट नेता मानिन्थे । बाबुरामले संविधान जारी भए लगत्तै असन्तुष्टि जनाएर पार्टी छोडे । टोपबहादुर भने त्यस लगत्तै बनेको सरकारमा उपप्रधानमन्त्री भए । अहिले भारतले चाहेजस्तो नेपालको संविधान संशोधन गर्न खोजिएका बेला माओवादी संसदीय दलका उनै नेता रायमाझीले आफ्नो पार्टीका अध्यक्ष पुष्पकमल दाहाल र पार्टी छोडेका नेता बाबुराम भट्टराई भारतका लागि काम गर्ने नेता भएको रहस्य खोलेका छन् । 

शुक्रवार नेपाल अध्ययन केन्द्रले बानेश्वरमा आयोजना गरेको कार्यक्रममा टोपबहादुरले बाहिर ल्याएको यो तथ्यले भारतको गुलामका रुपमा काम गर्दै आएका पुष्पकमल–बाबुरामलाई त नराम्ररी उजागर गर्यो नै, भारतको रणनीतिक स्वार्थलाई मधेसी जनताको अधिकार सावित गर्न मेहेनत गरिरहेका नेपाली सञ्चार माध्यममा कार्यरत लेखनदासहरुलाई पनि उत्तेजित बनाइदियो । मुलधारका कतिपय सञ्चारकर्मीले त रायमाझीले गरेको खुलासालाई ‘रायमाझी पथ’ भनेर तीतो पोख्दै आफूले अपनाएको ‘रन्जित रे पथ’को वचाउमा ट्वीट गर्न वाध्य भए । 

संविधान जारी गर्दा बाबुराम जस्तै भारत पनि खुब रिसाएको थियो । संविधान रोक्न विदेश सचिव एस जयशंकरलाई विशेष दूतका रुपमा पठाएर त्यसबेला भारतले संविधानमा सहमति जनाएका माओवादी अध्यक्ष दाहाललाई हेग पठाइदिने र लडाकु शिविरको हिनामिनामा जेल हालिदिने धम्की दिएको स्वयं दाहालले सार्वजनिक गरेका थिए । बाबुराम मार्फत भारत झेलिरहेका दाहालले त्यसबेला रिसाएर चर्चित भाषण नै दिएका थिए– ‘हामी एसम्यान हुँदैनौं ।’ 

दाहाललाई तर्साउन केहिदिनपछि बाबुरामले अर्काे भाषण गरेका थिए–‘प्रचण्ड अव जेल जान्छन् ।’ पार्टी छोडेर नयाँ शक्ति गठन गरेका बाबुरामको पार्टीलाई अहिले जनजाति र मधेसीका नाममा भारतले तयार गरेको रणनीतिक उद्धेश्यको छहारी दिने छाताका रुपमा विकास गर्न खोजिएको छ । एक वर्षअघि संविधान जारी गर्न सहमति जनाएका पुष्पकमललाई पनि प्रधानमन्त्री बनाइदिएर भारतले संविधान विरोधी आफ्नो बाटोमा फर्काएको छ र भारतको त्यही सर्त पूरा गर्न दाहालले संविधान संशोधन प्रस्ताव ल्याएका पनि छन् । नाकाबन्दी लगाएर नेपालीलाई गाल्न नसकेको भारतले एक वर्षयता नेपालले भूराजनीतिमा प्राप्त गरेका उपलब्धी भत्काउन दाहाललाई भरपुर प्रयोग गरेर केही सफलता हासिल गरिसकेको छ । 

पुष्पकमल, बाबुराम, अमेरश, महन्थ ठाकुर, उपेन्द्र यादव र अहिले आएर कांग्रेस सभापति शेरबहादुर समेत, यिनीहरु अलग अलग पार्टीमा रहे पनि एउटै मास्टरले ट्युसन पढाएका विद्यार्थी झैं फरक फरक कोणबाट एउटै भविश्यवाणी गरिरहेका छन्– नेपाल टुक्रिन्छ । 

भारतका रणनीतिक स्वार्थलाई नेपाली जनताको संबैधानिक असन्तुष्टिको रुपमा प्रचार गर्न यहाँका आमसञ्चारलाई पनि प्रयोग गरिरहेका बेला शुक्रबार माओवादी संसदीय दलका उपनेता रायमाझीले खुलासा गरेको रहस्य ठूलो चोट बन्न पुगेको छ । 

रायमाझीले उक्त कार्यक्रममा यसो भने– संविधान जारी भएलगत्तै स्थायी कमिटी बैठकमा बाबुरामजीले भन्नुभयो- संविधान त जारी भयो, तर यो कुनै पनि हालतमा लागु हुँदैन । मधेसमा आन्दोलन हुन्छ, भारतले त्यसलाई सघाउँछ । त्यसैले आजै विज्ञप्ति जारी गरेर मधेस आन्दोलनलाई सघाउने भनौं । भोलि हामीलाई त्यताबाट फाइदा हुन्छ ।

बाबुरामजीले त्यसो भनिरहँदा प्रचण्डजी चुप लाग्नुभयो । बाबुरामजीले अझ कुरा खोलेर भन्नुभयो- हिजो १२ बुँदे सम्झौतादेखि भारतको सहयोग बिर्सने ? भारतलाई धोखा दिन मिल्छ ?  तर पनि प्रचण्डले त कुनै जवाफ दिनुभएन ।

यो कुरा त गम्भीर थियो । मैले तुरुन्तै प्रश्न गरेँ- त्यसो भए तपाई संवैधानिक संवाद समितिको अध्यक्षले उनीहरुका एजेण्डा किन हाल्नुभएन संविधानमा ? हामीले भारतले गुन लाएको भनेर ब्याज तिर्नुपर्ने ? कसैको दास बनिरहनुपर्ने ?

यो प्रश्नको जवाफ प्रचण्डले दिनुभएन, बाबुरामजी त्यसपछि झोला बोकेर हिँड्नुभयो । आजभोलि कहिले चाइना कार्ड प्रयोग गर्न १२ बुँदे सम्झौता भारतमा गर्नु गल्ती भयो भन्नुहुन्छ । कहिले उपेन्द्र यादवलाई बोकेर संविधान संशोधन तुरुन्त गर्नुपर्योग भन्दै प्रचण्डलाई दबाब दिन बालुवाटार पुग्नुहुन्छ । राजनीति यस्तो छ हेर्नुस् ।’

रायमाझीले त्यसबेला पार्टी स्थायी समितिको बैठकमा भएका भन्दै शुक्रवार सार्वजनिक गरेका यी कुरा र त्यसबेलाका घटनाक्रमले वताउँछ– माओवादीलाई त्यसबेला संविधान जारी गर्नबाट रोक्न नसकेको भारतले बाबुरामलाई चुँडेर लगेको थियो र अहिले सिंगै माओवादीलाई आफ्नो पोल्टामा हालिसकेको छ । देउवा यसै पनि भारत परस्त छंदै थिए । दाहाल समेत भारतको पोल्टामा पुगेपछि दाहाल, देउवा र भट्टराई अलग पार्टीमा भए पनि दिल्लीको मिसनमा इमान्दार छन् । 

त्यसबेला बाबुरामका केही गतिविधि र अभिब्यक्तिबारे ध्यान दिने हो भने संविधान जारी गर्दा भारत जस्तै बाबुराम निकै क्रुद्ध थिए । संविधान जारी हुनु भन्दा २६ दिन पहिले टीकापुरमा भएको क्रुर घटना बाबुरामलाई अगाडि नै थाहा थियो । भदौ ७ गते भएको सो घटनाको केही दिनअघि उनले फेसबुकमार्फत संकेत गरेका थिए– संविधान जारी गर्नबाट नरोके देश टुक्रिनबाट रोकिने छैन । यस्तै भविश्यबाणि आजभोलि महन्थ ठाकुरले गरिरहेका छन् । पुष्पकमल, बाबुराम, कांग्रेस संसाद अमेरशकुमार सिंह, तमलोपा अध्यक्ष महन्थ ठाकुर, फोरम नेता उपेन्द्र यादव र अहिले आएर कांग्रेस सभापति देउपा पनि, यिनीहरु अलग अलग पार्टीमा रहे पनि एउटै मास्टरले ट्युसन पढाएका विद्यार्थी झैं फरक फरक कोणबाट एउटै भविश्यवाणी गरिरहेका हुन्छन् । 

संबैधानिक समितिको सभापति रहंदा पनि बाबुरामले जातीय क्षेत्रीय आन्दोलनलाई धाप दिंदै उकास्न मुख्य भूमिका खेलेका थिए । उनले जनजाति अगुवा, मधेसी अगुवा आदि आदि नाममा गोलमेच गर्दै दलहरुबीच भएको सहमति बिरुद्ध उकास्ने काम मात्रै गरेका थिएनन्, प्रतिबन्धित ठानिएका तराई पृथकतावादी सीके राउतलाई संबैधानिक समितिको तर्फबाट मान्यता दिएर पत्राचार समेत गरेका थिए । 

संविधान जारी भएको एक वर्षपछि भारतले आफ्नो इसारामा चल्ने कठपुतली सरकारका रुपमा पुष्पकमल र शेरबहादुरको गठबन्धन बनायो । उनीहरुको गठबन्धनले भारतको रणनीति अनुरुप नै संविधान संशोधन गरी नेपालको अखण्डता खण्डित गर्न लागिरहेका बेला माओवादी नेता रायमाझीले सार्वजनिक गरेका रहस्यहरु डर लाग्दा छन् । 

http://www.chakrapath.com बाट साभार