भ्रष्ट, राष्ट्रघाती, दलाललाई राजनीति सुम्पेर विश्राम लिन्न - नारायणकाजी श्रेष्ठ

भ्रष्ट, राष्ट्रघाती, दलाललाई राजनीति सुम्पेर विश्राम लिन्नःनारायणकाजी

काठमाडौं । नयाँ शिराबाट आन्दोलन उठाउनुपर्ने एकीकृत नेपाल कम्युनिस्ट पार्टी (माओवादी) का उपाध्यक्ष नारायणकाजी श्रेष्ठ ‘प्रकाश’ले बताएका छन् । छ दशकदेखि लामो संघर्ष र हजारौंको वलिदानबाट प्राप्त उपलब्धिहरुलाई संस्थागत वा उत्पीडितहरुको हक अधिकारलाई स्थापित हुने गरी संविधान निर्माण हुनुपर्नेमा प्रकाशको जोड छ ।

आन्दोलन उठानको लागि लक्ष्य, उद्देश्य, एजेण्डा, सहयात्री आदिको बारेमा प्रष्ट हुनुपर्नेमा जोड दिदैं प्रकाशले आन्दोलनको लागि आन्दोलनमात्र भनेर नहुने बताए ।

उनले राजनीतिमा भइरहेको भ्रष्टीकरणका विरुद्ध संघर्ष गर्नुपर्नेमा पनि उत्तिक्कै जोड दिएका छन् । आफू सार्वजनिक यातायातमा हिंड्नुको कारणलाई नारायणकाजीले त्यसै अभियानमा जोडेर हेर्न भनेका छन ।

‘आर्थिक स्रोत खुलाइदैंन, पार्टीबाट लगिएको छैन । गाडी चढिएको हुन्छ । पुख्र्यौली सम्पत्तिबाट पनि त्यो खर्च भएको होइन, एउटा नेताको महिनामा तीन लाखसम्म खर्च हुन्छ भने त्यसको स्रोत के हो जनतालाई थाहा दिनु पर्दैन ?’ नारायणकाजी श्रेष्ठले आक्रोस पोखे–‘वैठकमा जाँदा गाडीको जुलुश हुन्छ, गोडा राख्ने ठाउँ कार्यालय परिसरमा हुँदैन । त्यो पैसा गलत ढंगले लिएको भन्ने कसले बुझ्दैन ? यसलाई नसच्याएसम्म कसरी पार्टी, आन्दोलन बन्छ ?’

विद्यमान राजनीतिक विषय र पार्टीको आन्तरिक जीवनमा केन्द्रित रहेर नारायणकाजी श्रेष्ठसँग झिल्कोले गरेको कुराकानीको महत्वपूर्ण अंशः

तपाईंहरुले आन्दोलनको घोषणा गर्नुभएको छ । आन्दोलनको विकल्प थिएन ?

संविधानसभाबाट संविधान निर्माण हुनुपर्छ भनेर छ दशकदेखि संघर्ष भयो । योसँग दशौं हजारको वलिदान जोडिएको छ । उत्पीडितहरुको अधिकारलाई स्थापित गर्ने, उपलब्धिहरुलाई संस्थागत गर्ने चुनौती हाम्रो अगाडि छ । जनयुद्ध, जनआन्दोलन, शान्ति प्रक्रियापछिका आन्दोलनका सहयात्रीहरुसँगको सहकार्यबाट हामीले त्यसलाई समाधान गर्नुपर्छ ।

नेपाली कांग्रेस, एमालेको यथास्थितिवादी, खस संकीर्णता र शासकीय अहंकारका कारण समस्या परिरहेको छ । सहमतीय प्रक्रियाबाट संविधान बनाउने कार्यलाई लत्याएर बलपूर्वक वहुमतीय प्रक्रियाबाट अगाडि बढिएको छ ।

जनताको उपलब्धिको रक्षा, संस्थागत गर्न वहुमतीय प्रक्रियालाई उल्ट्याएर सहमतिमा लैजान आन्दोलन अनिवार्य भएको छ । सक्रियता र दृढतापूर्वक आन्दोलनमा जानुको विकल्प छैन् ।

यसमा अलि प्रष्ट हुन नसकेको विषय भनेको आन्दोलनकारीहरुको विविध मागहरु छन । यसले सबैका लक्ष्यहरुलाई कसरी सम्बोधन गर्न सक्ला ?

हो, मैले बढी जोड दिएको यहीनेर हो । आन्दोलनमा जान केही महत्वपूर्ण विषयमा प्रष्ट हुनैपर्छ । पहिलो, आन्दोलनको उद्देश्यबारेमा प्रष्ट हुनैपर्छ ।

संविधानसभाबाट सहमतिका आधारमा जनताको उपलब्धिलाई संस्थागत गर्न दवाव दिने हाम्रो आन्दोलनको मुख्य उद्देश्य हो कि के हो भन्ने त प्रष्ट हुनैपर्छ ।

योसँगै जोडिएको दोस्रो भनेको आन्दोलनको लक्ष्य वा एजेण्डाका बारेमा प्रष्ट हुनुपर्छ । पहिचान र सामथ्र्यका आधारमा संघीयता मुख्य कुरा हो कि के हो प्रष्ट हुनुपर्छ । पहाडमा उत्पीडित जातिको पहिचानको कुरा आएको छ भने तराई/मधेसमा त्यो छैन । त्यहाँ भूगोलमा जोड दिइएको छ । यो दोहोरो मापदण्ड किन ?

तराईमा पनि उत्पीडित भाषिक, साँस्कृतिक समुदायले पनि स्वशासनसहितको प्रदेश प्राप्त गर्ने भन्ने सही हो । हामी त्यसको पक्षमा छौं । झापा, मोरङ, सुनसरी, चितवन, कैलाली, कञ्चनपुर नभएसम्म संविधान बन्नै दिदैंनौ भनेर लड्ने हो भने हामी कहाँ पुग्छौ ? यस्ता कुरामा प्रष्टता र एकरुप समझदारीको आवश्यकता छ । यो बारेमा मैले सोमवारको सर्वदलीय वैठकमा समेत राखें ।

हामीले उत्पीडित वर्ग किसान र मजदुरलाई प्राथमिकतामा ल्याउनका लागि किन नलड्ने रु हाम्रो जोड त्यहाँ हुनुपर्ने होइन ?

तेस्रो, सहयात्रीको बारेमा प्रष्ट हुन आवश्यक छ । नेपालका कम्युनिस्ट र आमूल परिवर्तनका बीचमा एकता, सहकार्यको पक्षमा जोड दिनुपर्छ । संविधानसभा विघटन हुनुपर्छ भन्ने र संविधानसभाबाट नै संविधान बनाउनुपर्छ भन्नेबीचमा त्यही मुद्धामा कसरी संयुक्त आन्दोलन हुनसक्छ ? त्यसले त एक अर्कालाई प्रयोग गरिरहेको जस्तो भएन ? पछि एउटा विन्दुमा पुगेपछि एकले अर्कोलाई धोका दिएको भन्ने ठहरिदैंन ? जनतामा पनि कुन मुद्धामा आन्दोलन भइरहेको छ भन्नेमा आशंका र भ्रम पैदा हुन्छ ।

चौथो, आन्दोलनको कुरा गर्दा संघर्षको स्वरुपका बारेमा प्रष्ट हुन आवश्यक छ । व्यापक जनताले स्वीकार्ने प्रकृतिको आनदोलन उठाउनु पर्छ । बन्द, हडताल हर समयमा जानु हुँदैन ।

पाँचौ, अन्तर्राष्ट्रिय समर्थन लिनु आन्दोलनका लागि राम्रै हुन्छ तर विदेशी शक्तिको आड, भरोसा वा निर्देशनमा आन्दोलन अगाडि बढाउनु हुँदैन । हाम्रो आन्दोलन नेपाली जनतालाई सशक्त बनाउने प्रकृतिको हुनुपर्छ न कि विदेशी शक्तिलाई ऊर्जा दिनेखालको ।
हिन्दु पुनरुत्थानवादी र पृथकतावादीहरुले लाभ लिने ढंगको आन्दोलन बनाउनु हुँदैन ।

तपाईंको जोड चाहिं के हो त ?

यो आन्दोलन हाम्रो रहर होइन, वाध्यता हो । कांग्रेस, एमालेको यथास्थितिवादी, प्रतिगामी कदम नसच्चिकन, अग्रगमन संविधानका लागि सहमतिमा जाने प्रतिबद्धता नजनाएसम्म उनीहरुसँग सम्वाद÷वार्ता हुँदैन भन्नेमा हामी प्रष्ट छौं । उनीहरु सच्चिएर आएमा सहमतिमा संविधान बनाउनु पर्छ भन्नेमा हामी प्रष्ट हुनुपर्छ ।

कांग्रेस, एमालेको पेलेर नै जाने र विपक्षीहरुले त्यसको प्रतिवाद सडकबाट गर्ने अवस्थामा संविधानसभाको औचित्यता के हो ? 

प्रतिगामी/यथास्थितिवादी एजेण्डालाई कार्यान्वयन गर्न खोजिएको छ, त्यसको हामीले प्रतिवाद गर्नैपर्छ । गणतन्त्र, धर्मनिरपेक्षता, संघीयता, समानुपातिक, समावेशीकरण, शिक्षा, स्वास्थ्य, रोजगारीलाई मौलिक अधिकारको रुपमा राख्ने गरी हामी जानुपर्छ । जस्तो मौलिक अधिकारका लागि पहिलो संविधानसभामा धेरै मेहनतपूर्वक सीपी गजुरेलहरुले तयार गरेको विषयलाई पारित गर्न लडौं न ।

तपाईं केही नयाँ विषय ल्याउनु हुन्छ । तर, तपाईंलाई त्यसलाई कार्यान्वयन गर्न अप्ठ्यारो पर्छ । यस्तै समस्या परेपछि तपाईंले पार्टी र राजनीति छाड्ने भन्नुभएको हो ?

हाम्रो पार्टी यथास्थितिमा रहनु हुँदैन भन्ने कुरा मैले राख्दै आएको छु । भ्रष्टीकरण, प्रदुषण, स्खलनको प्रक्रिा तीब्र ढंगले बढेको छ । शहीदको सपना पूरा गर्नका लागि पार्टीलाई फेर्नुपर्छ भनेर मैले भन्दै आएको छु ।

सांगठानिक कार्यभार भनेर मुख्य कुरा रुपान्तरण, पुनर्गठन र नयाँ ढंगको पार्टी निर्माण भनेर भनिएको छ । यो निश्कर्ष सही छ । तर, त्यसको कार्यान्वयन खोई त रु पार्टी रुपान्तरण गर्नुपर्छ भनेर मैले भनेको हो फुटाउने या छाड्ने होइन । क्रान्तिकारी कम्युनिस्ट केन्द्र बनाउनु पर्छ भनेर क्रियाशील छु र भइरहने छु ।

क्रान्तिकारी आन्दोलनको स्खलनले क्रान्तिकारीहरुमा ठूलो निराशा पैदा भएको छ । परिवर्तनपछि जनताले परिवर्तन जीवनमा प्रयोग गर्न नपाएको अवस्था छ ।

राजनीतिक नेतृत्वको गलत पद्धतिको कारणले आमजनताले राजनीति भनेको फोहरी कुर्चीको खेल नै रहेछ भन्न थालेका छन् । राजनीतिलाई सफा गर्नुपर्छ भन्ने पक्षमा छु ।

राजनीतिमा भ्रष्ट, राष्ट्रघाती, दलाल र आफ्नो पदीय स्वार्थको मात्र चलखेल र भूमिका बढिरहेको छ । त्यसैले राजनीतिमा पनि शुद्धीकरण अभियान चलाइरहेको छु । यसरी मात्र देश बदल्न सकिन्छ ।

भ्रष्ट, राष्ट्रघाती दलालहरुलाई सुम्पेर म राजनीतिबाट विश्राम लिन सक्तिन । बरु राजनीति सफा गर्न र देश फेर्न अझ सक्रिय भएर लड्छु ।

- See more at: http://www.jhilko.com/%E0%A4%AD%E0%A5%8D%E0%A4%B0%E0%A4%B7%E0%A5%8D%E0%A4%9F-%E0%A4%B0%E0%A4%BE%E0%A4%B7%E0%A5%8D%E0%A4%9F%E0%A5%8D%E0%A4%B0%E0%A4%98%E0%A4%BE%E0%A4%A4%E0%A5%80-%E0%A4%A6%E0%A4%B2%E0%A4%BE%E0%A4%B2/#sthash.QNpcDye4.dpuf