माओवादीका मन्त्रीको कस्तो कमाई ? प्रकाश खर्च गर्न उदार, नारायणकाजी आउट

काठमाडौं, २० मंसिर । मन्त्रीहरू कमाउधन्दामा लागेपछि माओवादीभित्र असन्तुष्टि बढेको छ । प्रधानमन्त्री पुष्पकमल दाहाल मात्रै होइन, माओवादीका प्रयाः सबै मन्त्री अब फेरि कहिल्यै सरकारमा जाने पालो आउँदैन कि भनेझैं पारिवारिक बन्दोबस्तीमा जुटेका कारण असन्तुष्टि बढेको हो ।

प्रधानमन्त्री दाहाल आफ्ना परिवारका सदस्यहरूको जालो पार्टीको भागमा परेका सबै मन्त्रालयमा फिट गरेपछि त्यसको देखासिखी मन्त्रीहरूले पनि गरेका छन् । तरुण साप्ताहिकले समाचार छापेको छ ।

स्रोतका अनुसार प्रचण्डले आफ्ना भाइ नारायण दाहाललाई कर्मचारी फाँटको जिम्मा लगाइका छन् । उनी प्रधानमन्त्रीका प्रशासनिक सल्लाहकार हुन् । कमाइ हुने सरकारी कार्यालयहरूमा सुब्बा तहसम्म र अन्य निकायमा सहसचिवसम्मका कर्मचारीहरूसँग दाहालले सिधै सम्पर्क गरेर रकम संकलन गर्ने गरेको स्रोतको दाबी छ ।

गत दसैंमा उनले दसैं खर्च भन्दै ठूलो रकम जम्मा गरेका थिए । कर्मचारी संयन्त्रमा सरुवा बढुवालगायतमा पैसा उठाउने गिरोह पहिल्यैदेखि सक्रिय थियो । यतिवेला यही गिरोहको सल्लाहमा नारायण दाहालले काम गर्ने गरेका छन् ।

पार्टी फन्ड कलेक्सन गर्ने भन्दै रकम उठाइने गरिए पनि उक्त रकम पार्टी काममा प्रयोग नभएको माओवादीका नेता नारायणकाजी श्रेष्ठले आफ्ना निकटस्थहरूलाई बताउने गरेका छन् ।

प्रचण्डकी माइली छोरी रेणु दाहाल र ज्वाइँ अर्जुन पाठक तुलनात्मक रुपमा इमान्दार देखिएका छन् । छोरा प्रकाश दाहाल र बुहारी विना मगरले सरुवाको काम ल्याउन दुई–चार जना केटाहरू परिचालन गरेको बुझिएको छ ।

केही कर्मचारीहरूले कबोल गरेअनुसारको रकम नदिएका कारण अग्रिम पैसा लिएर मात्रै सरुवाका लागि सिफारिस गर्न प्रकाशले विनालाई दिर्नेशन दिएको स्रोतको भनाइ छ ।

यसरी कलेक्सन भएको रकम प्रकाशले साथी भाइ बोलाएर मोजमस्तीमा पनि खर्च गर्ने गरेका छन् ।

वरिष्ठ नेता नारायणकाजीको कुरा प्रचण्डको किचेन क्याबिनेटमा सुनुवाइ हुन छाडेको छ । आफ्नो कुरा सुनुवाइ हुन छाडेपछि गोरखा जिल्लाका कर्मचारीहरूको सरुवा तथा राजनीतिक नियुक्तिबोहक नारायणकाजीले खासै चासो लिएका छ्रनन् ।

नारायणकाजीले आफ्नो गृह जिल्ला गोरखाका बाबुकाजी पन्तलाई कृषि विकास मन्त्रालयअन्तर्गतको दुग्ध विकास संस्थानमा अध्यक्ष नियुक्तिका लागि निकै ठूलो प्रयास गरेका थिए । तर प्रचण्डको परिवारले रोकिदियो । यति बेला नारायणकाजीको ध्यान सिटीइभीटीको सदस्य सचिव नियुक्तिमा छ ।

http://www.dainiknepal.com बाट साभार