इच्छुक प्रतिस्ठानलाई ज्ञापनपत्र ?

भर्खरै विप्लव माओवादी निकट जनसाँस्कृतिक संघले इच्छुक साँस्कृतिक प्रतिष्ठानलाई ज्ञापनपत्र दिएको छ । ज्ञापन पत्रमा अनाधिकार इच्छाहरु पनि छन् । यो औचित्यहीन पनि छ । सँगसँगै यसलाई एक महिने अल्टिमेटम पनि भनिएको छ । ती मागको सम्वोधन नभए जे पनि हुनसक्ने र त्यसको जवाफदेही आफै हुनुपर्ने पनि उल्लेख छ । मानौं यो संस्था कुनै सरकारी निकाय हो र उनीहरुको लागि यो संस्था नै सरकार हो । जससित माग र अल्टिमेटम दिएर पूरा नभए कारवाही गरिनेछ ।

विप्लव नेतृत्वका साँस्कृतिककर्मीहरुलाई कुन वर्ग उनीहरुको प्रमुख दुश्मन हो र कुन वर्गसँग उनीहरुको मुख्य अन्तरविरोध हुन्छ भन्ने पनि थाहा नभएको देखियो । कोसँग लडाईंको केन्द्रविन्दु हुन्छ र कोसँग मागहरु तेर्साउनु पर्छ भन्ने पनि थाहा छैन भन्ने देखियो । अहिलेसम्म उनीहरुले सरकारसँग भने कुनै माग राखेका छैनन् । देशभरि यस्ता प्रतिष्ठान धेरै छन् र ती सत्ताधारी पार्टीसँग सम्बन्धित छन् जससँग साधन र स्रोतको पहुँच पनि छ । सरकारी प्रज्ञा प्रतिष्ठानसँग पनि उनीहरुले माग राख्ने जरुरत ठानेनन् । ती संस्थासँग होइन आफै सत्ताबाट पाखा रहेको संस्थासँग यस्ता माग गर्नुको आसय बुझिनसक्नु छ ।

आफ्नो क्षेत्रभित्र नपर्ने हकको पनि त्यहाँ माग गरिएको छ । त्यसमा विप्लवको पार्टीसम्बद्ध साँस्कृतिक मोर्चाका संयोजक माइला लामाले हस्ताक्षर गरे पनि अरुको नै इन्टरेस्ट लुकेको स्पष्ट देखिन्छ । जो हिंजो टाढा थिए, ती आज नजिक भएका छन् । स्वार्थबाट पे्ररित आत्मकेन्द्रित व्यक्तिवादी चरित्रका चैतेहरुको घेरामा माइला लामा जस्ता हिजोदखि नै समर्पित व्यक्तिहरु पर्नु दुखद कुरा हो । अनैतिक सिर्जना चोरीको आरोप प्रमाणित भएपछि कारवाहीमा परेका अशोक सुवेदी जस्ता नैतिक पतन भएका व्यक्ति होऊन् वा अवसरवादी ढुलमुले स्वार्थी द्रव्यधूर्त व्यक्ति स्वार्थ लम्पट अन्य कोही होऊन् ती सबैले बदनाम गर्ने माइलाको पार्टीलाई नै हो । पैसा भनेपछि नालीमा पनि मुख टटोल्नेहरु अहिले धेरै क्रान्तिकारी बन्दै माइला लामालाई बदनाम गराउने प्रक्रियामा लागेका छन् । प्रलेसले किन कारवाही गरेर अशोक सुवेदी जस्ताहरुलाई निकाल्न विवश भयो भन्ने कुरा त जग जाहेर भइसकेको छ । तर त्यसरी गनाएका नैतिकहराम गैरप्रगतिशील चरित्रका तुच्छ र क्षुद्र मुर्दाहरुलाई काँधमा बोकेर हिंड्दा भने माइलाहरुको काँध पनि अवश्य गनाउँछ नै । साँस्कृतिक क्षेत्रका विसंगतिलाई सफा गर्ने भन्नेहरुले नै साँस्कृतिक क्षेत्रमा खडा गरेको यो असाँस्कृतिक चरित्रको फण्डाफोर मात्र गर्न सकिन्छ । पाण्डव

http://www.jhilko.com बाट साभार